بواقي الضي 1

سفاح:

ضاقت فلما إستحكمت حلقاتها..

جعلت من قلمي أداة تهرب..

من واقع الدنيا ومن عقباتها..

لا تأمنوا هذي البلاد فإنها،

حملت لنا الظلمات في طياتها..

فجعلت من حبري مخارج أحرف..

وبكت خطوط يدي على صفحاتها..

لي قصة ما كنت أنوي سردها..

لكن قد ضقت ذرعا،

وضقت صمتا من صدى أناتها..

"وما بتنعدل"..

أصبح لسان الحال أعوج وما بسر..

ما بتنعدل..

صبحت ليالينا الفرح مليانة ضر..

وآمال مكفنة بالزمن..

وشقى وفقر..

فاضلي بس حبة نفس فوق الرويحة، 

أتم بيهو باقي العمر..

يا يابا ما ظنيت أكون ليك السند..

من قبل ما أبدا الطريق،

لقيتني في ود اللحد..

أحلامي ماتت يا أبوي..

وأصحابي بين نارين معاي..

وأنا شكلي محبوس للأبد..

تعليم شنو.؟!

خليني نوم..

"النوم تعال، سكت الجهال"..

وجهالك أسياد يا بلد..

زمن القراية أم دق خلاص..

ولى ورحل..

المدرسة بتملاك فشل..

والجامعة بس زي السجن،

ما بين مظاليم دون سبب..

والعندو راي فيها إنكتل..

خليني نوم..

أبتسم وأحلم براي..

Look Pa, its a new world where my hopes ain't gotta die..

And my mom ain't gotta cry..

And I know its only in my mind..

But,

At least these dreams are mine..

Look pa, I'm getting good at this..

Twisting words and manipulate..

Close my eyes and infatuate..

And please don't give me that,

"I know its food for your thoughts but will it put some food on your plate.?"

'cause no..

Around this country father, I guess its a little too late..

This is the land of blood broken hearts and broken bones..

Smiles are gone..

Rights are thrown..

And I guess our diginty is stuck somewhere the sand and the stones..

And I'm stuck in a dark zone..

Watching non-humans fighting over a seat in power..

The real life game of thrones..

So please let me go back to sleep..

I think its my only right..

And its feels just right..

And everytime I'll wake up..

I'll write..

'cause within this paper..

There's my fragments of light..

وأنا ما براي محبوس وضايق الكي..

معاي ناسا قلوبا هميمة حاسة البي..

سلام يا خي..

لساك بتتوجع براك.؟!

لساك بلدك ضايقة بيك ومألماك.؟!

قالولي في خاطرك كتابة..

وبواقي ضي زي الشمس في نص سماك..

أحكيلنا ياخ..

خالد:

بحكيلك الحاصل عليّ

بشكيلك أحوال الزمن

من كترة الحزن العليّ

ضيعت تعريف الوطن

يابلدي الكستنا مظالم

لسّاتها النفوس عامرابك

الولد اللي ضقتي عليه

لكنه بيموت في ترابك

عشان المِتله نحن بكتب

ولو آخر الكتابة مهالك

محتاج قبل أكتب "وطن"

أعرف هو ما معنى الوطن

ف …

"علمنا ما معني الوطن"

"ورينا كيف شكل الوطن"

"وقول لينا كم تمن الوطن"

"علمنا ما معني الوطن"

ياوطن الغلابة غِرقتْ

في بحر الكضب والزيف

من غُبن المهانة رعِفتْ

وجنياتك بطفشوا نزيف

ويا سلة غِذانا نِشفتْ

بتتسول بواقي رغيف؟

"علّمنا ما معنى الوطن"

معناه إنو الناس تعيش

وتموت على نفس المحن؟

معناه كل الناس تهج

ويتملّك أرواحها الحَزَن؟

معناه كل الناس تعود

ملفوفة بي نفس الكفن؟

"ورينا كيف شكل الوطن"

‏وطن سرقوه عزّ الليل

وطن حاكماه دبابة

وطن شقوه بالسكين

وقالو علينا خرّابة

ورينا كيف شكل الوطن

وهل بترضاه الخريطة؟

كلمنا عن ريحة الوطن

هل تشبه أحلامنا البسيطة

ورينا هل فضّل وطن

أم برضو ضاقتبو البسيطة

"قول لينا كم تمن الوطن"

‏وطن عينيه ما بتنوم

سارق حلمها الكاكي

وطن يحلم يبيت شبعان

وطول عمره بيبيت باكي

وقول لينا كم تمن الوطن

هل أغلى من تمن الرصاصة؟

ودم وليداتنا الصغار

هل أغلى أم كلب الحِراسة؟

فرّطت في كم ألف ميل

شان تبني بترابهم حراسة؟

"عرّف لي من تاني الوطن"

أديك تعريف يا بلد؟

أديك تعريفي البسيط

وأنا عندي أيه يعني الوطن

الوطن:

إنك تقوم من الصباح

على أرض فعلاً حقتك

ما أرض محكومة بسلاح

وجماعة كايسة مذلتك

وإنك إذا دق النحاس

في الصف بتملى محلتك

إنك تقيف وقفة رجال

من إسمه تاخد هيبتك

إنو الحقوق تكفل تساوى

ما بي قبيلتك وحلتك

وإنك إذا ظلمك قوي

من عينه تقلع ظِلمِتك

"عرّف لي من تاني الوطن"

أديك تعريف مختصر

وطنك محل ما تشتهي

وطنك حبيبتك وصُحبتك

وطنك عيون هادى الحبيبة

الجوة قلبها دسّتك

وطنك كتف صاحب هميم

شايل همومك ووجعتك

وأديك تعريفك هنا

من قلب واقعنا المعاق

وطنك بلاد نكرت هواك

بي ليل مظالم غطتك

وطنك بلاد ليلها الفساد

وصباحها محتاج وقفتك

وطنك متل زولاً كسيح

إن جيت تساعده يكفتك

وطنك بتبنيلهُ الفُلُك

وهو ماش وجاي بيفلقك

قول لينا لمتين يا بلد

حتغني زيفك وتسمعه

فارض على أولادك سفر

ولا مرة بتقول أرجعوا

فارد على ليلك مواجع

والصبح قافل مطلعه

قول لينا لمتين يابلد

حيكون شعارك "أطلعوا"؟!

‏سلام يا خي..

لساك بتتوجع براك.؟!

لساك بلدك ضايقة بيك ومألماك.؟!

قالولي في خاطرك كتابة..

وبواقي ضي زي الشمس في نص سماك..

أحكيلنا ياخ..

عمار:

"وأنا بحكي ليك

عن نفحه الاشواق 

لي وطن صامد 

برغم قساوه السكه 

و نشاف امالنا بين 

غربه و وطن كضاب "

و كلامي ليهو

ارجع كفاك تعال 

ارجع كفاك تعال

تعال نعتزا بيك وطن 

تعال ارجع 

تعال خلي ايامي بيك يندن 

هديل ناسك وراك رحلو 

تعال خلينا نستوطن 

نعيد الكان 

و آه ما كان علينا زمن 

و اعود و اطراك من تاني 

كل ما الوتر دندن

و غني عليهو ود

سيد احمد المقبول 

يهز في قلبي ليك شجن 

تعال و انا ليك

دوام طاري 

لو حتي كان هذا الوتر 

قطعوهو عمداً 

اصلو الحصل في غيابك اكبر 

من حكم ابيح فيه الشعب قهراً

تعال معاي و انا بحكي ليك

في غيابك يا وطن

زغروده ملت الحي 

جابوهو لينا شهيد 

لابس كمان الزي 

مرقن بنات الوجعه

في عرس الشهيد رقصن 

قدلن كمان بشوي

تربال و نوبه و عرضه 

غنو الكلام الني 

وام الشهيد موجوعه 

و ممنوعه قوله احي 

فيا و طناً عليك امالنا 

و معاك بنقاسي المر 

نهديك من دمانا سماد 

ما كان عشمنا شجر 

بيضلل عليك و بضلل

امال شهيدنا الحر

فيا وطني العزيز اصبر

لو مره شفتا النيل 

شارب سكاتو جمر

او شفت مره سماك 

فاقد جمالو قمر 

لا بد تطول يا ليل 

و دوام معاك نسهر

ما دام الصباح كضاب 

و الشمس طعمها مر

فيا وطناً تزيد الهم

افتش ليك في  سكه 

و تفتش لي في منفي

فكيف نقدر معاك نحلم

و كيف يبقي الحلم للنار 

شراره حق 

و لي ناساً تجدع و اصلو 

ما بتلحق 

و لي وطناً غشاهو الليل 

صبح منشق

و شاقي دروب مظنه و شك 

شكيناك نحنا للخالق 

ف وين منو بتزيح وشك

و نحنا علينا نتيقن 

قناديل الحلم في الروح

تساسك لي السقايه.. اذن 

جرحك دواهو الغيم 

فيا غيماً ربط قبلي 

و برق بي كل بواقي الضي

تعال نازل معاك دعاش 

يفرح كل صغار الحي

و في اخر كلامي بقول 

سلام للهدهد المسكين 

سلام لي نورا و الطيبين 

فيا بلادي عليك سلام 

ترانا نحنا مودعين

وبالرغم إنو الحال صعب..

صابرين عشان خاطر اللي فيك..

أحكلينا يا أخوي عن بلد..

فيهو البساطة المبهجة..

بالرغم من إنو البلد،

مالينا ضيق..

إسماعيل:

يا شعب بشوش

بي طيبتو الساكنة

قلوب ووشوش

الدايرو قليل

اسرة و تحنان

في حوش مرشوش

لمة حبان

في فتة بوش

ناس ويز نوتباد

يوم الاتنين

وتلات مفروش

الدايرو قليل

البنطق حق

ما ينوم مهروش

والظلم الناس 

لا يمرق سلطة

ولا بقروش

يا شعب بشوش

الدايرو قليل

ونسة اصحاب

في شارع النيل

يغشانا نسيم

رايق وعليل

نتهادي اماني 

وكلمة طيب

ونغني اغاني

باسم حبيب

ونشيل احلام

وعشم قدام

يا شعب بشوش

احلامك عيد

وحدة وتمجيد

ونغني نعيد

الايد في الايد

تتردد جوا متاهة الروح

كلمات بصوتك يابو السيد

والروح بتجود

بالريد لو سمعت صوت العود

الروح بتجود

بالريد لو سمعت صوت محمود

ويا شعب الناس

فيك مظلومة

ومفروضة عليك

الف حكومة

اجيال واجيال

ما انصلح الحال

حاكمنا الخال

الماسك كرسي

سنين وسنين

ستة وعشرين

يكفينا دعاوى باسم الدين

يا ناس اهدونا كلام وافكار

كلمة حنية وصوت جيتار

البهدي البسمة و ببني الدار

كل زول يدينا ورود فنو

ونخلي الناس والقالوا شنو

ديك لابسة كدا

وداك سوى كدا

و الزول اصلا محكوم ظنو

الحلم البكرة دا جد غالي

بي وطن مرفوع الهم عنو

بوطننا الليهو الناس غنوا