رسائل إلى الوطن المنفى

سلام مخصوص للصاحين
على طول الليالي حنين
سلام للفاتو و الما جنّ
وخلولنا الليالي حَزَن
سلام لي صُحبتي الطيبين
على جمر البُعاد قابضين
سلام يا صاحبي الفي القلب
سلام رغم النوى و البين
سلام يلغي المسافات قبل
يرتدالي طرف العين
سلام يا موطني الطيب
قبُل ما تنقسم وطنين

رسالة إلى الصديق الدُغري
الزول العديل و الصاح
لمتين القُعاد يا صاحبي
في البلد الملاني جِراح
كل يوم الحزن كاسيها
سنين دمع العيون نضّاح
و الساسة اللي جوها بليل
ما خلولنا باقي صباح
لمتين القُعاد يا خيّ
و مازال الوجع نتّاح
لمتين الهموم خانقانا
والعبّرة اللي ما بترتاح
ملعونة الأيادي الغادرة
ملعونة اللي شايلة سلاح
والناس اللي ماتت ساي
و أُماتها اللي ليلها نواح
لمتين العيون سهرانه
وفي الخد الدموع تنداح
لمتين ياخي والله كفانا
متين هذي البلاد ترتاح ؟!!

رسالة إلى حبيبة القلب
إلى أمي اللي ربّتني
يأمي البلاد ظالمة
وشال كل الهموم متني
محل ما تكوني ببقى وطن
وليكي القلب بيغني
لكن البلاد ظالمة
على منفاي طردتني
ويا أمي العباد ساكتين
على الحالة اللي غلبتني
و كيف راجين فرج و الناس
على الحال العوج ساكني
وما هادي البلاد إلاك
وماف غيرك مِصبرني
وكم هادي البلاد ظالماك
وبرضِك ليها بتغني
ما قادر أكون زيك
وأغني من القلب وطني
فيا طير المنافي غُناك
على لحن الوجع مبني
و يا هادي البلاد الغُربة
يا بلدي اللي هجرتني
متين أتغني بيك وطن
وطن من غير أسى و مِحني


رسالة إلي الحبيبة الجاية
في عز الزمان الصعب
جاية ترتب الفوضى
وتتوسد مساند القلب
و تزرع كل مساحتي غُنا
و تحصد كل همومي رُطب
فيا مالية القصيدة حنان
و عندك حرفي ما بينضب
ويا فارشة المسافة حنين
وفاردالي الشراع بالحب
متين نأمن مداين الريد
و ما يغشانا فيها تعب
متين كل الخلوق ترتاح
ونرميها الهموم في الجُب
متين أتنفسك و أفرح
تفرهد بيك مسام القلب


رسالة إلي الضمير الميت
الناس اللي لبسها ميري
لو كان الحكم زندية
كان خلاها ليك نميري ؟!
الشايف الدبابير هيبة
ومفتكر الحكاية فراسة
يات يوم الفوارس ركعت
وطاطت للبذلنا راسا
يا اخينا الفراسة أمانه
ما بتنباع عشان الساسه
صحيح الشعب حالتو تحير
مادينو المخدر دين
لكن الزمن دولاب
وسنينه العجاف جايين
إذا غراك زمانك عِزّة
جاييك الزمان الشين
جاييك القبر بي ضيقو
أها منو بتقبل وين ؟!


يا بلد المواجع جملة
شوارعك كم ملاني هموم
قسّمتي السهر لي ولادك
وكل واحد مظالم كوم
إذا هجرو المكان و أبوكي
فأبداً ما عليهم لوم
فهم لمّن قبيل نصروكي
جزيتيهم رصاص ودموم
وحين قالو الكلام الدغري
جزيتيهم إساءه و لوم
والناس اللشايفه و ساكته
خليكم بجيكم يوم
على جمر المظالم أقعدوا
لغاية ما القيامة تقوم
خلاص سِبنا الكلام و مشينا
كان عينيكِ تشبع نوم

ياربي الفرج من عندك
و تجبر خاطر المظلوم
والناس اللي ماتو عشانا
تجزيهم رحيق مختوم
يارب ليل المظلام طوّل
و زايدات المواجع دوم
اكرمنا بصباح من عندك
يعم هذي الجميلة عموم

من هنا للصباح الباهي
ودعناكِ الله يا خرطوم
ويا باقي الرفاق إنكربوا
على درب المنافي نقوم